“Sumqayıt” futbol klubunun müdafiəçisi Elvin Bədəlov QOL.az saytına müsahibə verib.
Futbolçu hazırlıq, yoldaşlıq oyunu və komandanın məqsədlərindən danışıb. Sual-cavabı təqdim edirik:
- Artıq bir neçə gündür məşqlərə başlamısınız. Hazırlıq necə keçir?
- Hər şey qaydasındadır. Gündə iki dəfə məşqə çıxırıq. Fiziki gücümüzü artırmaq üçün ağır məşqlər keçirik. Yoxlama oyununu da fiziki yüklənmənin təsiri altında keçirdik. Nələrsə alındı, nələrsə yox. Əsas odur ki, yanvarın 18-dək baş tutacaq çempionat oyununa hazır olaq.
- Yoxlama oyunundan danışmışkən, “Araz-Naxçıvan”la 2:2-lik bərabərliyi necə şərh edə bilərsiniz?
- Bu oyun barədə geniş fikir bildirmək istəməzdim. Hər hissədə fərqli heyətlərlə oynadıq. Meydanda gənclər də var idi. Əsas odur ki, indiki məqamda qaçmaq, tempi tutmaq, oyun praktikasını artırmaq bizim üçün vacibdir.
- Mövsümün ikinci yarısında “Sumqayıt”dan nə gözləmək olar?
- Əsas kuboku fikirləşirik. Çünki nəsə etmək üçün orada şansımız daha realdır. Bu təcrübəni yaşamışıq. İki dəfə final oynamışıq. İnanıram ki, bu dəfə də həlledici qarşılaşmaya yüksəlmək bizə qismət olacaq. Çempionatda da maksimum nəticə qazanmaq üçün sona qədər mübarizə aparacağıq.
- İndiki məqamda “Sumqayıt”ın potensialı dediyiniz hədəflərə çatmağa imkan verir?
- Hədəfimiz dördüncü yer və kubokun finalıdır. Bunun üçün komandanın potensialı var. Yeni transferlərimiz də olsa, nəsə etmək mümkündür.
- Son günlər əsas müzakirə mövzusu Premyer Liqada legioner limitinin ləğvidir. Bu barədə nə düşünürsünüz?
- Məncə, istənilən yerli oyunçudan soruşsanız, deyəcək ki, limit yığışdırılsa, pis olacaq. Qərarı verən biz deyilik. İndiki məqamda gözləmə mövqeyindəyik. Lakin hansı qərar qəbul edilməsindən asılı olmayaraq ona hörmətlə yanaşacağıq. Yəqin ki, hansısa qərar qəbul olunsa, bunun səbəbi də açıqlanar. Məncə, bu, yerli oyunçular üçün yaxşı deyil.
- Yaxşı deyil deyəndə yerli futbolçulara tələbatın azalmasını nəzərdə tutursunuz, yoxsa milli komandaya ziyanı olacağını düşünürsünüz?
- Tələbatın azalacağını düşünmürəm. Çünki yaxşı yerli futbolçularımız var. Gənclər, aşağıdan gələn uşaqlar üçün bir qədər çətin olacaq. Eləcə də bu, millimizə problem yarada bilər. Ona görə də nəsə düşünmək lazımdır. İndiki məqamda gözləyirik. Hansı qərarın qəbul olunacağı mənim üçün də maraqlıdır.
- Son zamanlar “Qarabağ”ın sizinlə maraqlandığı barədə xəbərlər yayılıb. Ağdam kubundan təklif almısınız?
- Xeyr, rəsmi təklif olmayıb. Bu, söz-söhbətdir. Nəsə olsaydı, bu barədə danışardım. Amma dediyim kimi, rəsmi heç nə yoxdur.
