"Sumqayıt" futbol klubu bu gün "Sabah"ı qəbul edəcək.
Matç ölkə kubokunun 1/4 final mərhələsinin cavab oyunu çərçivəsində keçiriləcək. Bilindiyi kimi, nəinki oyunun baş tutacağı şəhərdə, həm də ölkə ərazisində bir neçə gündür qısa fasilələrlə qar yağır.
Bəs, bu məqam oyunun keçirilməsinə mane ola bilərmi? Mehdi Hüseynzadə adına stadionun təmizlənməsiylə bağlı işlərin matçın startına qədər sona çatması mümkündürmü?
Football-plus.az-ın suallarını "Sumqayıt"ın mətbuat xidmətinin rəhbəri Zaur Xudiyev cavablandırıb:
"Hər şey qaydasındadır. Stadionun qardan təmizlənməsi yönündə işlər başa çatmaq üzrədir. Prosesin 95%-i geridə qalıb. Oyunun keçirilməsinə şübhə yaradacaq heç bir əsas yoxdur. Meydança təmizlənib. İndi ətraf sahələrdə işlər görülür. Ümid edirik ki, qar yağışı başlamaz. Amma hava şəraiti dəyişərsə, buna uyğun təcili tədbirlər görüləcək".
Xatırladaq ki, matç saat 19.30-da başlayacaq.
