“Sabah” futbol klubunun müdafiəçisi Stiv Solvet “Sumqayıt”a qarşı keçirdikləri matçla bağlı sualları cavablandırıb.
Futbolçunun futbolinfo.az saytına müsahibəsi:
- Misli Premyer Liqasının 6-cı turunda “Sumqayıt”ı qəbul etdiniz və 90 dəqiqənin yekununda meydanı 1 xalla tərk etdiniz (1:1). Oyunu necə şərh edərdiniz?
- Qarışıq hisslərdir. Bu, elə bir oyun idi ki, biz qalib gəlməliydik. Təəssüf ki, alınmadı. Artıq bu matçı unudub, qarşıdakı oyunlara köklənmişik.
- “Sumqayıt”la matçın hakimliyindən razı qaldınızmı? İki qolunuzun qeydə alınmadığı epizodlarda referinin qərarlarını haqlı sayırsınız?
- Şərh vermək istəmirəm, hakim qərarını verir – yaxşı da ola bilər, pis də. Artıq bunun üzərinə qayıtmaq mümkün deyil, növbəti oyunu düşünmək lazımdır.
- “Sumqayıt”la görüşün ilk hissəsində stadionun işıqları söndü. Karyeranızda bu cür məqamla ilk dəfə idi qarşılaşırdınız? İşıqların sönməsi komandanı tempdən salmadı ki?
- Xeyr, tempdən salmadı. Onu da deyim ki, bu vəziyyəti əvvəl də – Fransada, Nasional liqada yaşamışam.
- “Sumqayıt” bərabərlik qolunu sizin səhvinizdən sonra vurdu. Həmin anda topu meydanın fərqli hissələrinə uzaqlaşdıra bilməzdiniz? Buna nə mane oldu?
Bəli, epizodun görüntülərinə baxdıqdan sonra düşünürəm ki, daha yaxşı oynaya bilərdim. Sadəcə, həmin epizodda hücumçunun gəldiyini görmədim.
