Sumqayıtda şəhid Rəhman Məmmədovun xatirəsinə həsr olunmuş minifutbol turniri keçirilib. Bu haqda 12 may tarixində Sumqayıt24 “Sumqayıt” FK-ya istinadən xəbər verir.
Yarış “Kapital Bank Arena”da baş tutub. Turnirdə “Ərgünəş”, “Polad Həşimov” FK, İOEUGİM və “Sumqayıt” FK mübarizə aparıb. Oyunlar yekunlaşandan sonra turnir iştirakçıları diplom və medallarla təltif olunublar.
Mükafatlandırma mərasimində şəhid Rəhman Məmmədovun valideynləri – Natiq Məmmədov və Səadət Məmmədova, “Sumqayıt” FK-nın vitse-prezidenti Aydın Xəlilov, idarə və təşkilatların məsul şəxsləri, şəhidin döyüş yoldaşları, dostları və məşq yoldaşları iştirak ediblər.
Qeyd edək ki, “Sumqayıt” Futbol Akademiyasının yetirməsi olmuş Rəhman Məmmədov 1997-ci il fevralın 13-də anadan olub. Noyabrın 9-da – qələbəyə saatlar qalmış, Şuşa döyüşləri zamanı şəhid olub. Rəhman Məmmədov “Vətən uğrunda”, “Cəbrayılın azad olunmasına görə”, “Xocavəndin azad olunmasına görə” və “Füzulinin azad olunmasına görə” medalları ilə təltif edilib.
