“Sumqayıt” futbol klubu yeni baş məşqçisinin adını ən qısa zamanda açıqlayacaq.
Komandanın prezidenti Riad Rəfiyev ad çəkməsə də, komandanın sükanı arxasına dəvət etdiyi mütəxəssisin kifayət qədər tanınmış olduğunu anons edib.
SİTAT:
“Bu vəzifəyə bir neçə namizəd var. Hamısı xarici məşqçidir. Onlardan biri ilə müqavilə bağlamağa çox yaxınıq.
Demək olar müqavilə şərtlərində razılığa gəlmişik. Proses, uzağı, iyulun ilk həftəsinədək çəkəcək.
Təyinatın ondan o yana qalacağını düşünmürəm. Bu gün deyə bilərəm ki, yeni baş məşqçimiz kifayət qədər tanınmış biri olacaq.
Sürpriz təyinat kimi qarşılanacağı qənaətindəyəm. Demirəm bütün dünyada, amma Avropada tanınmış məşqçidir”.
Sportinfo.az-a daxil olan son məlumata görə, “kimyaçılar” Blaqoja Milevski ilə danışıqlar aparıb.
54 yaşlı çalışdırıcı 2021-ci ildən Şimali Makedoniya yığmasında işləyir. Onun yerli federasiya ilə müqaviləsinin başa çatmasına hələ 6 ay qalıb.
“Gənclik şəhəri” təmsilçisi bunu nəzərə alaraq, qurumdan icazə alıb və Milevski ilə dəyirmi masa arxasına əyləşib.
O, 2019-2021-ci illər aralığında baş məşqçisi olduğu Şimali Makedoniyanın gənclər yığmasını Avropa çempionatının final mərhələsinə daşıyıb.
2011-ci ildən məşqçilik karyerasına start verən Milevski ötən müddətdə yerli “Vardar”la yanaşı, İsraildə “Aşdod”u çalışdırıb.
