“Sumqayıt” futbol klubu akademiyası ilə bağlı yeniliklər edəcək. Sumqayıt24 bu barədə 12 oktyabr tarixində Report.az-a istinadən xəbər verir.
Dəyişikliklər infrastruktura aid olacaq. Klubun prezidenti Riad Rəfiyev bildirib ki, müxtəlif yaş qruplarındakı komandaların meydançasında süni qazon səriləcək.
Daha sonra o, digər layihədən də danışıb: “Bazamıza bitişik boş ərazi var. Artıq səlahiyyətli dövlət qurumları ilə razılaşdırmanın son mərhələsindəyik. Yekun razılıq əldə olunduqdan sonra həmin ərazidə uşaqlar üçün qapalı məşq meydançası tikməyi planlaşdırırıq. Bununla bağlı layihəmiz də hazırdır. Nəzərə alsaq ki, bazamız dənizə yaxındır, payız və qış fəsillərində hava soyuq və küləkli olur, belə olan halda isə valideynlər uşaqların məşq şəraitindən haqlı olaraq narahatlıq keçirirlər. Qapalı meydançada isə bu kimi problemlər aradan qaldırılacaq”.
Klub prezidenti son olaraq qeyd edib ki, bazanın iki təbii örtüklü meydançası da daha keyfiyyətli qazonla təmin olunacaq.
