“İki həftə Sumqayıtda, iki həftə də Qəbələdə hazırlıq keçdik. Mövsümə yaxşı hazırlaşdığımızı düşünürəm".
Bunu Fanat.Az-a açıqlamasında "Sumqayıt"ın müdafiəçisi Ayxan Süleymanlı deyib.
İlk çempionat matçını "Kəpəz"ə qarşı keçirəcək "kimyaçılar"ın futbolçusu belə danışıb:
"Hələ hazırlığımız davam edir. Deyərdim ki, tam olmasa da, 80 faiz forma yığmışıq. Yaxşı heyət formalaşdırmışıq. Artıq baş məşqçimiz Saşa İliçin bizdən nə istədiyini bilirik. Təbii ki, onun futbol fəlsəfəsini zamanla daha yaxşı anlayacağıq. Yəni buna doğru gedirik".
Arxa xətt oyunçusu şəxsi hədəfləri barədə sualı da cavablandırıb:
"Yeni mövsümdə əsas hədəfim komandamın məqsədinə çatmasına mümkün qədər çox kömək etməkdir. Bundan başqa, Allah qoysa, zədəsiz mövsüm keçirib sabit oyun göstərmək istəyirəm".
Qeyd edək ki, "Sumqayıt" ilk çempionat matçını "Kəpəz"ə qarşı keçirəcək.
Avqustun 17-də Mehdi Hüseynzadə adına Sumqayıt şəhər stadionunda baş tutacaq qarşılaşmanın start fiti 20:30-da səsləndiriləcək.
