Mehdi Hüseynzadə adına stadionun açılışı yubanır. Sumqayıt24 bu haqda 26 aprel tarixində Futbolinfo.az-a istinadən xəbər verir.
Stadionun tikintisinə 5 milyon manatdan çox vəsait və bir neçə il sərf olunsa da, arenada qüsurlar aşkarlanıb. Xidməti otaqlar, otel, müxtəlif idman növləri üçün nəzərdə tutulan zallar, məşq meydanı hazır deyil. Həmçinin havalandırma sistemləri düzgün quraşdırılmayıb, azarkeşlərin tribunalara rahat keçidi təmin olunmayıb.
Ən böyük qüsur isə projektorların düzgün qurulmamasıdır. Bu səbəbə görə meydanın tam işıqlandırılması mümkünsüzdür. Problemi aradan qaldırmaq üçün projektorlar tamamilə sökülməli, başqa yerdə quraşdırılmalıdır.
Stadionun direktoru Nadir Quliyev deyilənləri təkzib edib: “Stadionla bağlı heç bir problem yoxdur. Hər şey qaydasındadır. Ot örtüyü, işıq sistemi yerindədir. Arena Prezident İlham Əliyevin Sərəncamı ilə tikilib və açılışı dövlət başçımız etməlidir. Onun proqramına uyğun olaraq, açılış olacaq”.
