“Sumqayıt” futbol klubunun qapıçısı ilə “Şamaxı”nın legioneri arasında mübahisə yaranıb. Sumqayıt24 bu haqda Report-a istinadən xəbər verir.
Məlumata görə, oyundan sonra topdaşıyanlardan biri 31 yaşlı malili yarımmüdafiəçi Sadio Tounkaraya göstərərək, "Qaranın ayaqqabısına bax" deyib. Bu sözlərdən təsirlənən afrikalı oyunçu onların üzərinə gedib, lakin komandamızın qolkiperi Tərlan Əhmədli məsələyə müdaxilə edib.
Əhmədli, topdaşıyanların həmin oyunçuya nə isə dediyini, lakin həmin ifadəni tam eşitmədiyini söyləyib: “Komanda yoldaşım Rüfət Abdullazadə yanımızda yıxılmışdı, onu ayağa qaldırırdım. Bu zaman Tounkara məni söydü. Ona dedim ki, günahım nədir? Əslində topdaşıyanlar ona nəsə demişdi, o da elə bilmişdi ki, biz söyüş söymüşük. Nəticədə söyüşlə cavab verdi. Bir anlaşılmazlıq oldu, ciddi problem yoxdur. Sonradan hər şey qaydasına düşdü. Rəqib komanda da bildirdi ki, anlaşılmazlıq olub".
Əhmədli irqçiliyə qarşı olduqlarını qeyd edib: "Biz heç vaxt elə sözlər işlətmərik və kiməsə "qara" demərik. O ifadələrin işlədilməsi də düzgün deyil. Belə hallara da heç vaxt yol vermərik".
Tounkaranın özü isə məsələ barədə danışmaq istəmədiyini söyləyib.
