AFFA Sumqayıtda azyaşlıları futbol inventarları ilə təmin edib.
Xəbər verdiyimiz kimi, “Kimyaçılar” qəsəbəsinin uşaqları ərazidə stadion tikilməsi ilə bağlı Sumqayit24.az-a müraciət etmişdilər. Sonradan isə aidiyyəti qurumlar məsələ ilə bağlı ərazidə müəyyən işlər həyata keçirdilər.
İndi isə H.Z.Tağıyev qəsəbəsində yaşayan azyaşlı uşaqlar üçün Assosiasiya tərəfindən onların futbol oynadığı ərazidə şəraitin yaxşılaşdırılması istiqamətində addım atılıb.
Bildirilib ki, qəsəbə sakinlərinin istifadəsi üçün minifutbol qapıları quraşdırılıb, uşaqlara oyun formaları, jiletlər, futbol topları və digər zəruri idman ləvazimatları təqdim olunub.
Tədbirdə iştirak edən AFFA-nın Kütləvi Futbol Departamentinin rəhbəri Fərrux İsmayılov azyaşlı futbolsevərlərlə görüşərək onlara uğurlar arzulayıb.
O, həmçinin vurğulayıb ki, futbolun kütləviliyinin təmin olunması və uşaqların sağlam həyat tərzinə yönləndirilməsi AFFA-nın daim diqqət mərkəzindədir və bu kimi layihələr gələcəkdə də davam etdiriləcək.
