Futbol üzrə Azərbaycan Kubokunun finalının Sumqayıtda keçiriləcəyinə dair məlumatlar yayılıb.
KİV-də həlledici oyuna Mehdi Hüseynzadə adına Sumqayıt şəhər stadionunun ev sahibliyi edəcəyi bildirilir.
Sumqayit24.az məlumatların nə dərəcə doğru olduğunu öyrənmək üçün “Sumqayıt” FK-nın mətbuat katibi Zaur Xudiyevlə əlaqə saxlayıb. Z.Xudiyev bununla bağlı hələlik rəsmi müraciətin daxil olmadığını deyib:
“Sadəcə belə bir ehtimala qarşı şifahi olaraq klubun mövqeyini öyrəniblər. “Sumqayıt” FK da bildirib ki, əgər belə bir rəsmi müraciət olarsa, buna təkcə klub yox, həmçinin digər tərəflər də razılıq verməlidir.
Ümumiyyətlə isə infrastruktur olaraq, Mehdi Hüseynzadə adına Sumqayıt şəhər stadionu ölkə kubokunun final matçını keçirməyə hazırdır. Əgər rəsmi müraciət olarsa və tərəflər arasında məsələ həll olunarsa, o zaman oyunu problemsiz keçirə bilərik”.
