Sumqayıt şəhər Yanğından Mühafizə İdarəsinin komandası mini-futbol üzrə çempionatda yüksək yer tutub. Sumqayıt24 bu haqda Fövqəladə Hallar Nazirliyinə istinadən xəbər verir.
Heydər Əliyevin anadan olmasının 99 illiyinə həsr olunmuş yarışda Dövlət Yanğından Mühafizə Xidmətinin (DYMX) mərkəzi aparatı, Sumqayıt və Bakı qarnizonlarının idarə, dəstə və hissələri iştirak ediblər. Xidmətin idman bazasında təşkil edilən çempionatda 20 komanda mübarizə aparıb.
Nəticəyə görə, şəhərimizin Yanğından Mühafizə İdarəsinin komandası 2-ci yerə layiq görülüb. Qaliblərə FHN işçilərinin Həmkarlar İttifaqının kubok, medal, diplom və qiymətli hədiyyələri təqdim edilib.
