Heyət olaraq birgə çalışmalıyıq ki, nəticələrimiz yaxşı olsun.
Sumqayit24.az xəbər verir ki, bunu "Sumqayıt”ın basketbolçusu Demetrius Antonio Kortrez Leyk klubun mətbuat xidmətinə açıqlamasında deyib.
“Gənclik şəhəri” təmsilçisinin yeni transferi öncə komanda haqda danışıb: “İstedadlı oyunçulardan qurulan kollektivik. Məşqçi heyətimiz də yüksək səviyyədədir. Oyunçular arasında əla anlaşma var. Biz hazırda B Liqasının sonuncu pilləsində qərarlaşsaq da, hazırkı vəziyyətə görə o qədər də narahat deyilik. Çünki mövsüm uzundur. Heyət olaraq birgə çalışmalıyıq ki, nəticələrimiz yaxşı olsun”.
Leyk komandanın məşqçi heyəti barədə yüksək fikirlər səsləndirib: “Azərbaycana gələnə qədər də Ukrayna və Belarusda da rusiyalı və belaruslu məşqçilərin başçılığı altında oynamışam. İş elə gətirdi ki, burada da rusiyalı mütəxəssisin çalışdırdığı komandada da top qovmalı oluram. Aleksandr Mixaylovun işindən razıyam. O, bizə öz oyun fəlsəfəsini aşılaya bilib. Onun başçılığı altında biz inkişaf edirik”.
Demetrius ölkəmiz haqqında da fikirlərini bölüşüb: “Azərbaycan çox gözəl və təhlükəsiz ölkədir. Vaxtımın daha çox hissəsini Bakıda keçirirəm. Amma Sumqayıt da paytaxtdan heç də geri qalmır. Burada hər şey ürəyimcədir”.
