“Sumqayıt”ın hücumçusu Rüstəm Əhmədzadə Sportinfo.az-a müsahibə verib.
Sözügedən müsahibəni təqdim edirik:
- Premyer Liqanın son turunda “Turan Tovuz”a böyük hesabla (0:3) uduzdunuz. Bu cür məğlubiyyəti nə ilə əlaqələndirmək olar?
- Nəticə özü hər şeyi deyir. Konkret hansısa səbəb göstərmək çətindir. Sadəcə, bu məğlubiyyətdən nəticə çıxarmalıyıq. Məşqlərdə daha çox çalışmalıyıq ki, növbəti matçlarda yaxşı nəticələr qazanaq.
- “Sumqayıt” mövsümə uğurlu start versə də, son 3 turda cəmi 1 xal qazanıb. Komanda enişdədir?
- Eniş deməzdim. “Turan Tovuz” yaxşı komandadır. Onlara qarşı oynamaq hər zaman çətindir. Epizodları qollara çevirdilər, hesabda önə keçdilər. Bilirik ki, hesabı “Turan Tovuz” açırsa, geridönüş etmək çox çətindir. Hesabda geri düşdükdən sonra böyük qüvvə ilə irəli atıldıq. Bu səbəbdən də qapımızda ikinci, üçüncü qolu gördük.
- İkinci hissədə, hesab 0:2 olarkən komandanız penaltini qaçırdı. Həmin anı matçın qırılma nöqtəsi saymaq olar? Hər halda hesab arasındakı fərq azalsaydı, oyunun gedişatı tam dəyişərdi...
- İndi nəsə demək çətindir. Biz də istəməzdik ki, belə olsun. Bəlkə də 1:2 olsaydı, matçın qalan dəqiqələri daha gərgin alınardı. Lakin artıq olan oldu.
- Son turlardakı uğursuz çıxışı nəzərə alsaq, çempionatda yaranan fasilənin “Sumqayıt” üçün faydalı olacağını deyə bilərik?
- Bəli, fasilə bizim üçün 100% faydalı olacaq. Komandamız iki həftə ərzində yaxşı hazırlıq keçəcək. Çatışmazlıqlar üzərində iş gedəcək. Bu məğlubiyyətdən sonra daha güclü olacağımıza əminəm.
- Premyer Liqada legioner limitinin ləğvi yerli futbolçuların çıxışına nə dərəcədə təsir göstərir?
- Açığı, xüsusi bir fərq hiss etmirəm. Kim güclüdürsə, o da meydana çıxır. Fərqi yoxdur, yerli futbolçudur, yaxud legioner.
