"Sumqayıt" futbol klubunun yarımmüdafiəçisi Səbuhi Abdullazadə legioner həyatı yaşaya bilər. Türkiyənin iki klubu orta sahə oyunçusu ilə maraqlanır.
Sportinfo.az-ın məlumatına görə, söhbət Birinci Liqa iştirakçılarından gedir. 23 yaşlı oyunçu da karyerasını Türkiyədə davam etdirməyə isti yanaşır. Danışıqlar uğurla tamamlanarsa, milli komandamızın üzvü ilk dəfə ölkə xaricinə yollanacaq.
Əks halda, böyük ehtimalla "8 nömrə" "Sumqayıt"da işinə davam edəcək. Abdullazadə "Sumqayıt"ın yetirməsidir və bütün karyerası yetirməsi olduğu klubla bağlıdır.
O, "kimyaçılar" formasında keçirdiyi 167 oyunda 6 qol, 17 məhsuldar ötürmə ilə yadda qalıb.
