Xəbər verdiyimiz kimi, “Sumqayıt” futbol klubu baş məşqçi Vaqif Cavadovla müqavilə müddətini uzadıb. 35 yaşlı mütəxəssisin işi qənaətbəxş hesab olunub və o, qarşıdakı 2,5 il müddətində komandanın sükanı arxasında olacaq.
Cavadov məşqçi karyerasına yeni başlayıb və hazırda “A” lisenziyası vardır. Bir çox sosial şəbəkə istifadəçiləri onun Premyer Liqa komandasına rəhbərlik etmək hüququna malik olub-olmadığını müzakirə edir. Bəziləri “A” lisenziyası olan məşqçilərin buna icazəsi olmadığına dair iddialar səsləndirirlər.
Sumqayit24.az məsələni aydınlaşdırmaq üçün “Sumqayıt” FK-nın mətbuat katibi Zaur Xudiyevlə əlaqə saxlayıb. O açıqlamasında bildirib ki, “A” kateqoriyası ilə Azərbaycan Premyer Liqasında məşqçilik etmək mümkündür:
“Buna icazə var. Heç bir problem yoxdur. Lakin bu lisenziyaya malik mütəxəssis UEFA-nın qaydalarına əsasən avrokuboklarda komandaya rəhbərlik edə bilməz.
Fevral ayında AFFA-da “Pro” lisenziyası üçün kurslar başlayacaq və Vaqif Cavadov orada iştirak edəcək. Təbii ki, klub tərəfindən də ona şərait yaradılacaq. Kursları keçəndən, normativləri yerinə yetirəndən sonra Cavadov müvafiq kateqoriyanı alacaq”.
