“Sumqayıt” klubunun qızlar komandası rəqibini darmadağın edib. Sumqayıt24 bu haqda 13 mart tarixində xəbər verir.
Yüksək Qızlar Liqasında 14-cü turun oyunları keçirilib. Xanım futbolçularımız “Kapital Bank Arena”nın ehtiyat meydançasında Şəkinin “Marxal” kollektivini qəbul ediblər. Sabir Mütəllimovun yetirmələri 11 cavabsız topla qələbə qazanıblar. Qolları Şəfəq Nəsirova (5), Aybəniz Əsgərzadə, Rövşanə Sərdarlı, Sevinc Babayeva və Nübar Eminova vurublar.
Qeyd edək ki, “Sumqayıt” hazırda liqanın məğlubiyyətsiz lideridir. Komandamız 10 qələbə və 4 heç-heçə ilə 34 xal toplayıb. 78 dəfə rəqib torlarını silkələyən “kimyaçılar”ın oyunçusu Şəfəq Nəsirova isə 51 qolla liqanın bombardiridir.
