Uğur Cahangirovun "İmişli"yə keçidi son anda baş tutmayıb.
Sportinfo.az-ın məlumatına görə, "Sumqayıt" klubunun forvardı ilə anlaşmaq mümkün olmayıb. Düzdür, 22 yaşlı futbolçu "kimyaçılar"la sağollaşıb, bölgə klubunun düşərgəsinə yollanıb. Amma klub rəhbərliyi ilə üzbəüz söhbətdə tərəflər ortaq məxrəcə gələ bilməyib.
Bu səbəbdən son anda İmişli təmsilçisi keçiddən imtina edib, 22 yaşlı forvard isə yenidən "kimyaçılar"a qoşulmalı olub.
Lakin onun yenidən başqa aşağı liqa klublarından birinə icarəyə verilməsi öz aktuallığını tam itirməyib.
Xatırladaq ki, Sumqayıt futbol akademiyasının yetirməsi bu mövsüm əsas komandanın heyətində 6 Premyer Liqa matçında forma geyinib.
