“Sumqayıt” futbol klubunun müdafiəçisi İsa Sulimanın futbolinfo.az saytına müsahibəsi
– Zədə ilə əlaqədar olaraq, uzun müddətdir ki, “Sumqayıt”a kömək edə bilmirsiniz. Hazırda vəziyyətiniz necədir?
– Vəziyyətim gündən-günə yaxşılaşır. Ən qısa zamanda yaşıl meydanlara qayıtmaq üçün hər gün dayanmadan çalışıram.
– Cari mövsümün sonunadək sizi yaşıl meydanlarda görə biləcəyik?
– Mən də buna ümid edirəm. Gücüm daxilində görməli olduğum çox iş, çatmaq istədiyim məqsədlər var. Mövsümün sonuna qədər sıralara dönəcəyimə ümidliyəm.
– “Sumqayıt” qış fasiləsindən sonra qələbə qazana və qol vura bilmir. Bunun səbəbini nədə görürsünüz?
– Komandamız üçün çətin məqamdır. Amma düşünürəm ki, tezliklə vəziyyəti dəyişə biləcəyik. Çünki komandanın hər bir üzvü məşqlərdə əlindən gələni edir, var gücü ilə çalışır.
– Yəqin ki, çətin vəziyyətində “Sumqayıt”a kömək edə bilməmək sizi ikiqat üzür…
– Elədir ki, var. Komandanın mübarizəsini kənardan izləmək və bu durumda kömək edə bilməmək mənim üçün asan deyil. Ancaq zədələr də futbolun bir hissəsidir. Buna görə də səbirli olmalıyam. Ümid edirəm ki, tezliklə komandaya kömək edə biləcəyəm.
– “Sumqayıt”ın növbəti oyunu Azərbaycan Kubokunda “Sabah”a qarşı olacaq. Bu görüşdən gözləntiniz nədir? “Sumqayıt” yarımfinala adlaya biləcək?
– Çox çətin matç olacaq. “Sabah” güclü rəqibdir. Bu cür kubok oyunlarında liqadakı vəziyyətiniz o qədər də rol oynamır. Çünki bir oyunçu kimi bunun yarımfinala yüksəlmək üçün tək şans olduğunu dərk edirsiniz. Buna görə də əminəm ki, müsbət nəticə üçün komandanın hər bir üzvü əlindən gələni edəcək.
– “Sumqayıt” hazırda Premyer Liqada 7-ci pillədə qərarlaşıb və sonuncu yerin sakinini cəmi 4 xal qabaqlayır. Sizcə, Premyer Liqanı tərk etmək təhlükəsi futbolçuların üzərindəki təzyiqi daha da artırırmı?
– Bəli, təzyiqi artırır. Ancaq biz belə düşünə bilmərik. Çünki bütün diqqəti çıxışımıza və qələbə qazanmağa yönəltməliyik. Bunu bacarsaq, hazırkı vəziyyətdən çıxacağıq.
– Növbəti mövsümdə Azərbaycan Premyer Liqasında 12 komanda mübarizə aparacaq. Bundan əlavə, yeni sezondan etibarən legioner limitinin də ləğvinə qərar verilib. Bir əcnəbi futbolçu kimi, son qərarlara münasibətiniz necədir?
– Yeni qərarlar liqanın marağını artıracaq. Şəxsən mən çempionatda komanda sayı artacağına görə sevinirəm. Çünki bu, fərqli oyun tərzinə malik daha çox futbolçuya qarşı oynamaq və özünü sınamaq şansıdır.
