Sumqayıtlı idmançı növbəti dəfə dünya birincisi olub.
Sumqayit24.az xəbər verir ki, Rusiyanın paytaxtı Moskva şəhərində pauerliftinqin AWPC/WPC/WPSO-A/WPSO versiyası üzrə dünya çempionatı keçirilib.
Yarışda Qırğızıstan, Qazaxıstan, Özbəkistan, Belarus, Macarıstan, Çexiya, Rusiya və digər ölkələrdən olan 560-a yaxın idmançı mübarizə aparıb.
Pauerliftinq üzrə Azərbaycan millisinin üzvü Zaur Cəfərov "bench press" hərəkətində 320 kiloqram nəticə ilə yeddinci dəfə dünya çempionu adına layiq görülüb. O, həm də üçüncü dəfə "Elitar idmançı" tituluna yiyələnib.
İdmançı bu il iyunun 9-14-də Finlandiyanın Salo şəhərində AWPC/WPC versiyası üzrə keçirilmiş Avropa çempionatında da qızıl medal qazanıb. O, AWPC versiyası üzrə "bench-press" hərəkətində 263 kiloqram nəticə ilə yeddinci dəfə bu titula sahib çıxmışdı. Həmçinin, yeni Avropa rekorduna imza ataraq, yarışın mütləq çempionu adına layiq görülmüşdü.
Xatırladaq ki, Azərbaycanın Əməkdar idman ustası olan Zaur Cəfərov dəfələrlə nüfuzlu yarışlarda ölkəmizi uğurla təmsil edərək, fəxri kürsünün ən yüksək pilləsinə qalxıb.
