Sumqayıtlı boks müəllimi gənclərdən ibarət yığmaya baş məşqçi təyin edilib. Onun ilk sınağı 10-22 aprel tarixlərində Bolqarıstanın paytaxtı Sofiyada keçiriləcək Avropa çempionatına təsadüf edəcək. Sumqayıt24 bu haqda Boks Federasiyasının saytına istinadən xəbər verir.
Sumqayıtın baş məşqçisi olan həmin şəxs Elbrus Rzayevdir. O, yeni təyinatla bağlı təəsüratlarını bölüşərkən, çox həyəcanlı olduğunu və rəhbərliyin onun qarşısına qoyduğu hədəflərə çatmaq üçün çalışacağını bildirib.
"Gənclərdən ibarət yığmaya təyinatım gözlənilməz oldu. Bu barədə məlumatım yox idi. Bir gün öncə Azərbaycan Boks Federasiyasının rəhbərliyi ilə görüş zamanı bundan xəbər tutdum”,- deyə Rzayev qeyd edib.
Xatırladaq ki, Elbrus Rzayev fevral ayında keçirilən ölkə birinciliyində ən yaxşı məşqçi adına layiq görülmüşdür.
