Sumqayıtlı futbolçu karyerasını xaricdə davam etdirmək üçün ayrıldığı kluba müəyyən məbləğ ödəyib.
Fanat.az-ın məlumatına görə, karyerasını Xorvatiyada davam etdirmək istəyən Rüfət Abdullazadə "Səbail"lə yolları ayırmaq üçün kluba müəyyən məbləğ ödəməli olub.
Qeyd edək ki, 24 yaşlı hücumçu "Varajdin" klubunda forma geyinəcək. Xorvatiya təmsilçisi Rüfətlə üçillik müqavilə imzalayıb.
Belə ki, "Ərzurumspor"un Rüfətlə bağlı təklifini geri çevirən "Səbail" bu transferdən 60 min manat qazanıb. Məsələ burasındadır ki, həmin məbləği Xorvatiya tərəfi yox, futbolçu özü klub rəhbərliyinə verərək "Varajdin"ə azad agent kimi yollanıb.
Qeyd edək ki, Abdullazadə "Sumqayıt" yetirməsidir. O, 2023-cü ildə "Səbail"ə keçib və anlaşması gələn yay başa çatacaqdı.
