Qrosmeyster Şəhriyar Məmmədyarov şahmat üzrə dünya çempionatından danışıb. Sumqayıt24 bu haqda 6 may tarixində Report.az-a istinadən xəbər verir.
O, karyerasının ən yaxşı vaxtlarında Maqnus Karlsenə rəqib olduğundan təəssüfləndiyini bildirib:
“Maqnus Karlsen çox güclü idi və onunla rəqabət aparmaq mümkün deyildi. Bu, bir az da bizim şanssızlığımız idi. Hazırda isə hər bir şahmatçının dünya çempionu olmaq şansı var”.
Sumqayıtlı şahmatçı ulu öndər Heydər Əliyevin 100 illik yubileyinə həsr olunan “Baku Open 2023” Beynəlxalq Şahmat Festivalından da söz açıb:
“Ölkəmizdə dəfələrlə yüksək səviyyəli yarışlar keçirilsə də, “açıq” tipli, bütün şahmatçıların iştirak edə biləcəyi turnirin keçirilməsinə ehtiyac var idi. Təəssüf ki, mənim də, Teymurun da (Rəcəbov – red.) bu tipli yarışlarda iştirakımız illik planlarımıza uyğun deyil, amma Azərbaycanda belə bir təşkilatçılıq çox böyük uğurdur. Ulu öndərimiz də şahmatı çox sevirdi və daim dəstək olurdu”.
Ş. Məmmədyarov Bakıda keçiriləcək Dünya Kubokunun onun üçün çox çətin olacağını düşünür:
“Sistemi mənim oyun stilimə uyğun gəlmir. Amma düşünürəm ki, bu, tarixin ən güclü turnirlərindən biridir. İki ildən bir keçirilir və olduqca önəmli yarışdır. Dörd il qabaq keçirilmiş Dünya Kubokunda Teymur qalib gəlmişdi. Ümid edirəm ki, biz yenə də bu yarışda uğurlu çıxış edəcəyik. Üstəlik bu yarışın Azərbaycanda keçirilməsi şahmatın ölkəmizdə nə qədər sevildiyini göstərir. İnanıram ki, bu dəfə də yüksək səviyyəli turnirə şahidlik edəcəyik”.
“Şah” qeyd edib ki, Dünya Kuboku yarışlarında uğurlu çıxış etməsə də, ölkəmizdə keçirilən turnirlərdə daha yaxşı oynayır. Misal kimi o, 2015-ci ildə, ilk dəfə Dünya Kuboku Bakıda keçiriləndə 1/4 finala qədər rahat gəldiyini, sonradan öndə olduğu halda gələcək çempion Sergey Karyakinə uduzduğunu xatırlayıb:
“Azərbaycanda keçirilən bütün turnirlərdə uğurlu çıxış etmişəm. Amma Dünya Kuboku başqa bir sistemdir. “Bağlı” yox, “açıq” turnirdir. 200-ə yaxın şahmatçı iştirak edəcək. Belə yarışlarda mən öz istədiyim riskli oyunu göstərə bilmirəm. Bu da lazımi nəticə qazanmağıma mane olur”.
