Çin Xalq Respublikasının Usi şəhərində keçirilən dünya çempionatı Azərbaycan taekvondo yığması üçün dərin kədər anları ilə yadda qalıb. Yarışlarda ölkəmiz cəmi bir bürünc medal qazanıb, lakin komandada hər kəsin yaddaşına ən çox Sumqayıtdan olan 21 yaşlı taekvondoçu Adil Eyvazovun qəfil vəfatı həkk olunub.
İdman.Biz-in məlumatına görə, məhz bu ağır xəbər milli komandamızın liderlərindən biri, 2022-ci ilin dünya çempionatının bürünc mükafatçısı Cavad Ağayevin çıxışına ciddi təsir edib. Məlum olub ki, Cavad Ağayev mərhum Adil Eyvazovun çox yaxın dostu olub və onun ölüm xəbərini dayanqa çıxmazdan cəmi bir neçə dəqiqə əvvəl alıb.
Komanda nümayəndələrinin bildirdiyinə görə, Cavad bu xəbəri eşitdikdən sonra döyüşmək istəməyib:
"Hamımız bu faciəvi xəbəri eşidəndə şokda idik, amma ən çox Cavad. Çünki Adil onun çox yaxın dostu idi. Biz onu döyüşə kökləməyə çalışdıq, dedik ki, indi o, iki nəfər üçün – həm özü, həm də Adil üçün qalib gəlməlidir. Amma o, tam başqa vəziyyətdə idi. Bu qədər qısa vaxtda özünü toparlaması mümkün deyildi".
Sumqayıtlı idmançı Adil Eyvazov uzun illərdir taekvondo ilə məşğul olurdu və gənc yaşına baxmayaraq, bir çox yerli turnirlərin qalibi kimi tanınırdı. Onun vaxtsız vəfatı həm şəhər idman ictimaiyyəti, həm də milli komanda üçün böyük itki sayılır.
