Misli Premyer Liqasının 17-ci turunda diqqətçəkən məqamlardan biri də “Qarabağ” – “Sumqayıt” matçına təsadüf etdi. Belə ki, “gənclik şəhəri”nin təmsilçisinin tribunalarda görməyə öyrəşdiyimiz fanklubu “UltraSumqayıt” “Tofiq Bəhramov”a gəlmədi. Sonradan bəlli oldu ki, azarkeş qrupu “Sumqayıt”ın onlara hörmətsizlik etdiyini düşündüyündən komandanı çətin səfər matçında dəstəkləməkdən vaz keçib.
“UltraSumqayıt” məsələ ilə bağlı bəyanat yayıb:
“Klub şəhərimizin digər fanklubundan fərqli bizim istəklərimizi qarşılamır. Halbuki hər iki azarkeş qrupu da Sumqayıtındı. Niyə ayrı-seçkilik edirlər? Anlamırıq... 60-70 manatı qarşılaya bilməyən klubdan hansısa uğur gözləmirik”.
Onda “UltraSumqayıt” bundan sonra komandanı dəstəkləməyəcək? Söhbət konkret hansı istəklərdən gedir? Bu suallarla football-plus.az fanklubun rəhbəri Qüdrət Allahverdiyevə müraciət edib. Onun cavabı isə belə olub:
“Bilindiyi kimi, “Qarabağ”la matç səfərdə keçirildi. Burda bilet məsələsi var. Onsuz da rəqib komanda qonaqlar üçün müəyyən sayda bilet ayırır. Biz azı 30-40 nəfərik. Bu üzdən hər birimiz 3 manat ödəməli oluruq. Avtobuslar da 80 manata aparır. İş orasındadı ki, “Sumqayıt” bu xərcləri qarşılamaq istəmir. Daha əvvəl klub tərəfindən bizə kömək edilib. Edilməliydi də. Amma dəfələrlə bütün xərcləri öz cibimizdən qarşılamışıq. Biz heç maddi dəstək də gözləmirik. Məsələ odur ki, bizə verilən sözlər yerinə yetirilmir. Bundan sonra hansı addımı atacağımız haqda qərarı öz aramızda razılaşandan sonra verəcəyik”.
