H.Z. Tağıyev qəsəbəsində qonşusunu “ana söyüşü”nə görə amansızcasına qətlə yetirən şəxsə hökm oxunub. Sumqayıt24 bu barədə 7 sentyabr tarixində Kriminalqafqaz.az-a istinadən xəbər verir.
Hadisə 23 iyul 2021-ci ildə qeydə alınıb. 29 yaşlı Ağabəy Atabalayev 49 yaşlı Sevil Abdullayevanı 42 bıçaq zərbəsi ilə öldürüb. Sumqayıt Ağır Cinayətlər Məhkəməsinin qərarı ilə gənc 17 il müddətinə həbs edilib.
Məhkəmə prosesində məlum olub ki, A. Atabalayevin valideynləri 2009-cu ildə vəfat ediblər. Bundan sonra o, kiçik qardaşları ilə birgə evlərində yaşamağa davam edib. Bir müddət sonra qonşuluqda yaşayan S. Abdullayevanın həyat yoldaşı da dünyasını dəyişib.
Araşdırmalar zamanı məlum olub ki, onların arasında dəfələrlə mübahisə yaranıb. Ağabəy bu barədə bibilərinə danışıb və onlar Sevillə mübahisə ediblər. Sevil isə Ağabəyə baş verənlər barədə bibilərinə danışdığı üçün irad bildirib və onun vəfat etmiş anasının ünvanına nalayiq ifadə işlədib. Məlum olay məhz bundan sonra baş verib.
Qeyd edək ki, bir neçə ay sonra hadisəni törədən şəxsin qardaşı R. Atabalayevlə qətlə yetirilmiş Sevil Abdullayevanın qızı ailə qurublar.
