Sumqayıt Dövlət Universitetinin (SDU) tələbəsini oğurlayan şəxsə hökm oxunub. Bu haqda 27 aprel tarixində Sumqayıt24 News24.az-a istinadən xəbər verir.
Hadisə Şamaxı rayonunda baş verib. Mərzəndiyə kəndinin 29 yaşlı sakini Samir Yaqubov Şamaxı-Bakı-Sumqayıt marşrutu ilə idarə etdiyi avtobusda sərnişin olan qızı qaçıraraq Quba rayonuna aparıb. Həmin gün o, marşruta başqa sərnişin götürməyib və yolda avtobusu Quba istiqamətinə sürərək qızı oğurlayıb. 1 sutka ərzində gənc qızı avtobusda saxlayan 29 yaşlı Samir daha sonra polislər tərəfindən tutulub. Universitet tələbəsi olan qız isə ailəsinə qaytarılıb.
Hadisədən sonra Samir barəsində Cinayət Məcəlləsinin “Adam oğurluğu” maddəsi ilə iş açılıb və o həbs edilib. Cinayət işinin materialları daha sonra Sumqayıt Ağır Cinayətlər Məhkəməsinə göndərilib.
Məhkəmə prosesi hakim Fəhmin Hümbətovun sədrliyi ilə keçirilib. Oğurlanan 20 yaşlı Gülşən Təhməzova (ad və soyad şərtidir) Samirin onu evlənmək üçün qaçırdığını, əgər ona razılıq verməsə, avtobusu aşıracağı ilə təhdid etdiyini bildirib: “Mən Sumqayıt Dövlət Universitetinin tələbəsiyəm, Sumqayıtda kirayə evdə qalıram, həftəsonu isə Şamaxıya qayıdıram. Məni Sumqayıta babam aparıb-gətirir. O olmayanda isə avtobusla gedib-gəlirəm. Hadisə baş verən günü, yəni 2022-ci ilin oktyabrın 30-u babam zəng edib avtobusda yer saxlatdırdı, mən də avtovağzala gedib sürücünün göstərdiyi yerdə əyləşdim. Avtobusda başqa sərnişinlərin olmamasından şübhələnmədim. Bir nəfər şəxs əlində sellofan gətirib sürücüyə verdi, o da həmin sellofanı maşının arxasına qoydu, sonra telefonla kiməsə zəng edib: “hazır olun, gəlib götürəcəm sizi”,- dedi. Yola çıxanda mən telefonla zəng edib babama xəbər vermək istəyərkən Samir gəlib, telefonu əlimdən alıb sındırdı. Qapının açıq olduğunu görüb, oradan qaçmaq istədim, lakin qolumdan və saçımdan tutaraq oturacağa əyləşdirdi. Niyə belə etdiyini soruşanda təhqir edib oturacaqda əyləşməyimi tələb etdi. Maşını sürməyə davam edəndə yolda olan işarələrdən Şamaxıya yox, Qubaya getdiyimizi bildim. Samirə nişanlı olduğumu, məni geri qaytarmasını dedim. Samir isə məni sevdiyini, ailə qurmaq istədiyini, ona “hə” deməyəcəyim təqdirdə maşını aşıracağını bildirdi. Biz bir gün avtobusda qaldıq. Ondan şikayətçiyəm və barışmamışam”.
Sumqayıt Ağır Cinayətlər Məhkəməsində keçirilən prosesin yekununda tələbə qızı oğurlayan avtobus sürücüsünə 6 il müddətinə həbs cəzası təyin edilib.
