7 yaşlı Fərid Bakarovun ölümünə səbəb olan sambo məşqçisi həbs olunub. Sumqayıt24 bu haqda 2 may tarixində xəbər verir.
Sumqayıt Şəhər Məhkəməsi 19 nömrəli məktəbin idman zalında uşağa ağır xəsarətlər yetirən 29 yaşlı Mehman Xəlilov barəsində 4 ay müddətinə həbs-qətimkan tədbiri seçilib. Hazırda Cinayət Məcəlləsinin 126.3-cü (Qəsdən sağlamlığa ağır zərər vurma - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə açılmış işin istintaqı davam etdirilir.
İlkin araşdırmalar zamanı məlum olub ki, Mehman Xəlilov hadisədən dərhal sonra Fəridin yaxınlarına onun yıxılaraq xəsarət aldığını bildirib. Lakin onun məşqdə azyaşlılara qarşı qəddar rəftar göstərməsi üzə çıxıb və müşahidə kamerasının çəkdiyi görüntülər istintaq orqanı tərəfindən götürülüb.
Yaxınlarının dediyinə görə, məşqçi ailəyə məlumat vermədən uşağı xəstəxanaya aparıb. Orada müəllimə uşağı ixtisaslaşmış xəstəxanaya aparmaq tövsiyə edilsə də, o, Fəridi evlərinə aparıb. Uşağın ailə üzvləri onun vəziyyətinin yaxşı olmadığını görüb və yenidən xəstəxanaya çatdırıblar. Amma azyaşlı burada vəfat edib.
Hazırda idman zalında çəkilmiş digər görüntülər də araşdırılır. Mehman Xəlilovun digər uşaqlara qarşı da eyni rəftarı göstərməsi istisna edilmir.
