Novxanı qəsəbəsində qohumunun evinə gedən kişi ev sahibini bıçaqlayıb.
Sumqayit24.az xəbər verir ki, qəsəbə sakini Əlşir Lazımov qohumu İntiqamın dəvəti ilə onun evinə qonaq gedib. Evə daxil olanda görüb ki, İntiqam tanışı olan bir qadınla yemək-içmək məclisi təşkil edib. O da onlarla birlikdə oturaraq çörək yeyib və spirtli içki qəbul edib.
Bir neçə saatdan sonra qadının oğlu gələrək anasını evlərinə aparıb. Ə.Lazımov getmək istəyəndə, qohumu onu buraxmayıb və birlikdə qadının evinə getməyi təklif edib. Əlşir qadını tanımadığı üçün bu təklifi qəbul etməyib, lakin İntiqam əl çəkməyib.Nəticədə o,məcbur qalıb və İntiqamla birlikdə həmin qadının evinə yollanıb.
Ünvana çatanda qapını qadın yox, onun oğlu açıb. O, İntiqamı tanıdığı üçün evə buraxıb, Ə.Lazımovu isə içəri buraxmayıb. Daha sonra Əlşirlə qadının oğlu həyətdə mübahisə ediblər. Dava düşüb və qadının oğlu onu döyüb.
İki gün sonra Əlşir İntiqamın evinə gələrək onu küçəyə çağırıb və ona görə döyüldüyünü bildirib. Tərəflər arasında mübahisə yaranıb və bu zaman Ə.Lazımov üzərində gəzdirdiyi bıçaqla ona 4 zərbə endirib.
İntiqam ağır xəsarətlərlə xəstəxanaya yerləşdirilib.
Polis əməkdaşlarının keçirdiyi tədbirlər nəticəsində Ə.Lazımov saxlanılıb və barəsində məhkəmə qərarı ilə həbs qətimkan tədbiri seçilib. Faktla bağlı cinayət işi başlanılıb və iş Bakı Ağır Cinayətlər Məhkəməsinə göndərilib. Məhkəmənin hökmü ilə Ə.Lazımov 1 il 6 ay azadlıqdan məhrum edilib.
