Sumqayıtda Psixiatriya Xəstəxanasından 46 min manatlıq oğurluq edən şəxslər həbs olunublar. Bu haqda 26 may tarixində Sumqayıt24 Daxili İşlər Nazirliyinin mətbuat xidmətinə istinadən məlumat verir.
ŞPİ-nin əməkdaşları tərəfindən hadisəni törətməkdə şübhəli bilinən şəhər sakinləri Ziyəddin Qəmbərov və Azər Qasımov saxlanılıblar. Onlar xəstəxananın pəncərəsinin dəmir barmaqlıqlarını qıraraq içəridən ümumi dəyəri 46 min manat olan kompüter avadanlıqları, yaddaş qurğuları, tibbi ləvazimatlar və digər elektron avadanlıqlar oğurlayıblar. Hər iki şəxs ifadələrində etdikləri oğurluq hadisəsini etiraf ediblər.
Tibb müəssisəsindən oğurlanan avadanlıqların bir qismi saxlanılan şəxslərdən aşkar olunaraq maddi sübut kimi götürülüb.
Faktla bağlı Cinayət Məcəlləsinin “oğurluq, yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla törədildikdə” maddəsi ilə cinayət işinin ibtidai istintaqına başlanılıb.
Məhkəmənin qərarı ilə saxlanılanlar barəsində həbs qətimkan tədbiri seçilib. Hazırda cinayət işi üzrə zəruri istintaq tədbirləri davam etdirilir.
Bu şəxslərin qanunsuz əməllərindən zərər çəkən digər vətəndaşlar varsa, Sumqayıt Şəhər Polis İdarəsinə (ŞPİ), "102" Xidməti Zəng Mərkəzinə və ya DİN-in sosial şəbəkələrdəki rəsmi səhifələrinə müraciət edə bilərlər.
