Gənc cüdoçu Turan Rüstəmovu qətlə yetirməkdə təqsirləndirilən Sumqayıt sakini Ruslan Səfixanovun məhkəməsinin hazırlıq iclası keçirilib. Sumqayıt24 bu haqda 11 aprel tarixində Report.az-a istinadən xəbər verir.
Bakı Ağır Cinayətlər Məhkəməsinin hakimi Rasim Sadıxovun sədrliyi ilə keçirilən prosesdə səs-küy yaranıb. Mərhumun anası Ruslana qarşı ittihamlar səsləndirib.
Məhkəmədə təqsirləndirilən şəxsin anket məlumatları dəqiqləşdirilib. Məlum olub ki, o, hadisəni törədən zaman İdman Akademiyasında təhsil alıb.
Daha sonra məhkəmə baxış iclasına təyin olunub. Proses aprelin 25-ə baş tutacaq.
Qeyd edək ki, Turan Rüstəmovun 50-yə yaxın yaxını, qohumları və dostları Bakı Ağır Cinayətlər Məhkəməsinin qarşısında aksiya keçiriblər. Onlar Turanın qatilinə ömürlük cəza verilməsini tələb ediblər.
Xatırladaq ki, hadisə ötən ilin noyabrında Şağan qəsəbəsində yerləşən idman arenasında baş verib. 21 yaşlı Ruslan Səfixanovun mübahisə zamanı Yevlax rayon sakini, 16 yaşlı Turan Rüstəmovu bıçaqlayaraq öldürməsinə əsaslı şübhələr müəyyən edilib.
Ona qarşı Cinayət Məcəlləsinin 120.2.2 (qəsdən adam öldürmə, xuliqanlıq niyyəti ilə adam öldürmə) maddəsi ilə ittiham irəli sürülüb.
