Qadını şantaj edən Sumqayıt sakini Elmir Sultanovun kassasiya şikayətinə Ali Məhkəmədə baxılıb. Sumqayıt24 bu haqda 2 iyun tarixində Pravda.az-a istinadən xəbər verir.
Hakim İlkin Rəcəbovun sədrliyi ilə keçirilən prosesdə qərar elan olunub. Kassasiya şikayəti təmin edilməyib.
Sumqayıt Şəhər Məhkəməsinin hökmü ilə Elmir Sultanov 5 il 6 aylıq həbs olunub. Sumqayıt Apellyasiya Məhkəməsi onun şikayətini təmin etməyib.
Qeyd edək ki, hadisə 2021-ci ildə baş verib. Daxili İşlər Nazirliyinə müraciət edən qadın TikTok-da özünü polis kimi təqdim edən şəxslə tanış olduğunu, daha sonra onun hədə-qorxu gələrək pul tələb etdiyini bildirib.
Həyata keçirilən təxirəsalınmaz tədbirlər nəticəsində şübhəli şəxs qismində Elmir Sultanov saxlanılıb. O, etdiyi əməli etiraf edib. E. Sultanovun yaşadığı evdə və avtomobilində polis mayoru xüsusi rütbəsi olan paltarlar, polis əməkdaşı görüntüsü yaratmaq üçün əldə etdiyi suvenir qandal, polis şevronları və digər maddi sübutlar aşkarlanıb.
İstintaq tədbirləri zamanı müəyyən edilib ki, o, bir neçə il əvvəl də özünü yalandan polis əməkdaşı kimi təqdim edərək insanlardan pul tələb etdiyi üçün məhkum olunub.
