Arvadının gözünü çıxaran şəxsə Sumqayıtda hökm oxundu. Sumqayıt24 bu haqda 4 aprel tarixində Qafqazinfo.az-a istinadən xəbər verir.
Sumqayıt Ağır Cinayətlər Məhkəməsinin qərarı ilə ötən ilin yanvar ayında vurduğu yumruqla arvadını gözsüz qoyan Ağdaş sakini, 49 yaşlı Elxan Nəbiyev 6 il müddətinə həbs edilib.
Məhkəmə prosesində bildirilib ki, E. Nəbiyev L. Nəbiyeva ilə 16 il əvvəl ailə qurub. Onların münasibəti normal olub. Hadisədən əvvəl L. Nəbiyeva gəlini ilə birlikdə Sumqayıtda yaşayan xəstə qardaşını ziyarət edib. Elxan zəng edərək onları maşınla evə gətirməyi təklif edib. Lakin qadın imtina edib. Bir neçə saat sonra onlar Xəzər bağları massivində kirayə qaldıqları evə qayıdıblar. Elxan arvadına taksi ilə qayıtdığı üçün iradını bildirib və yumruqla göz nahiyəsinə zərbə endirib. Bu zaman qadının gözündən qan axmağa başlayıb və o, sol gözünün görmə qabiliyyətini tamamilə itirib.
Məhkəmədə sualları cavablandıran L. Nəbiyeva bunları deyib: “Hadisə vaxtı gəlinim bizi ayırmağa çalışırdı, uşaqlar isə ağlayırdı. Uşaqlar gözümü necə çıxardığını gördülər. Elxan bu hadisədən əvvəl də məni döyüb. Bu səbəbdən də ondan boşanmışam və şikayətçiyəm”.
Nəticədə E.Nəbiyev məhkəmə zalından birbaşa cəzaçəkmə müəssisəsinə göndərilib.
