Sumqayıtda yaşayan alman qıza təcavüz edən şəxs həbs olunub. Sumqayıt24 bu haqda 18 aprel tarixində Qafqazinfo.az-a istinadən xəbər verir.
Hadisə ötən ilin payızında Bakının Səbail rayonunda baş verib. İttihama görə, paytaxtın mərkəzindəki gecə klubunda sərxoş halda olan 20 yaşlı qızı kirayə yaşadığı evə aparan 29 yaşlı F. Abdullayev onu zorlayıb.
Məhkəmədə bildirilib ki, Azərbaycana könüllü kimi gəlmiş və Sumqayıtda rəfiqəsi ilə yaşayan Katherina K. (şərti ad) oktyabrın 7-də və 8-də dostları ilə əvvəlcə evdə, sonra isə gecə klublarında içki qəbul edib. Gecə saat 04:00 radələrində F. Abdullayevin dəvəti ilə onun evinə gedib. Hadisə də həmin vaxt baş verib.
Şikayətçinin sözlərinə görə, ağır dərəcəli sərxoş vəziyyətdə olduğundan həmin şəxslə necə getdiyini və hadisənin tam olaraq necə baş verdiyini xatırlamır. Lakin ona təcavüz edildiyini düşünür. Zərərçəkmiş bildirib ki, hadisə nəticəsində bakirəliyi pozulub. 20 yaşlı qızın üzərindəki xəsarətlər və digər ekspertiza nəticələri də təcavüzün baş verdiyini təsdiq edib.
F. Abdullayevə Bakı Ağır Cinayətlər Məhkəməsinin hökmü ilə 4 il həbs cəzası verilib.
