Tanınmış plastik cərrah Türkan Gündüzün həyat yoldaşı tərəfindən qətlə yetirilməsi ilə bağlı yeni iddialar ortaya çıxıb. Bu haqda 8 may tarixində Sumqayıt24 Qafqazinfo.az-a istinadən xəbər verir.
Hadisə mayın 7-si gecə saatlarında Novxanı kəndi, İlqar Mirzəyev küçəsində yerləşən bağ evində baş verib. Türkiyə vətəndaşı, 56 yaşlı Muhammet Gündüz həyat yoldaşı, tanınmış plastik cərrah Türkan Gündüzü (Hacıyeva) bıçaqlayıb. Ağır xəsarətlər alan 41 yaşlı qadın hadisə yerində vəfat edib.
Yayılan iddialara əsasən, Türkan ərinin evdə çalışan xidmətçi qadınla münasibətini əks etdirən görüntüləri onlara göndərib. Həmin videoların bağ evində çəkildiyi ehtimal edilir. Hadisənin bu görüntülərlə bağlı olub-olmaması, cinayətin konkret hansı səbəbdən baş verməsi hələlik məlum deyil.
Faktla bağlı Cinayət Məcəlləsinin “qəsdən adam öldürmə” maddəsi ilə açılmış cinayət işinin istintaqı davam etdirilir.
Türkan Gündüz bir sıra tanınmış klinikalarda, eləcə də Türkiyədə “Acıbadem” xəstəxanasında fəaliyyət göstərib, həmçinin vaxtaşırı televiziya kanallarında qonaq olub. T.Gündüzün son iş yeri Bakıda “City Hospital” klinikası olub.
