Sumqayıtda dələduzluq edən Abbasəli Mayılovun (şərti) cinayət işi üzrə məhkəmə istintaqı yekunlaşıb. Sumqayıt24 bu haqda 6 iyun tarixində Pravda.az-a istinadən xəbər verir.
Bakı Ağır Cinayətlər Məhkəməsində hakim Rahib Salmanovun sədrliyi ilə keçirilən prosesdə hökm oxunub. Qərara əsasən, o, 7 il 6 ay müddətinə azadlıqdan məhrum edilib.
İttihama görə, Abbasəli Mayılov özgənin əmlakını ələ keçirmək məqsədilə bir neçə şəxsə qarşı dələduzluq edib.
O, həmin şəxsləri uğurlu bizneslə məşğul olmasına inandıraraq Sumqayıtda avtosalon icarələyib. Almaniya və Gürcüstandan gətirəcəyi avtomobilləri sataraq qazancın yarısını onlarla bölüşəcəyi barədə yalan vəd verib.
Abbasəli Mayılov bu yolla 450 min manata yaxın pulu dələduzluq yolu ilə ələ keçirib.
