Sumqayıtda 13 yaşlı tələbəsinə dəfələrlə seksual xarakterli hərəkətlər etməkdə ittiham olunan 53 yaşlı müəllim Ceyhun Əliyevə hökm oxunub.
Qafqazinfo.az-ın məlumatına görə, proses Hafiz Əliyevin sədrliyi ilə Sumqayıt Ağır Cinayətlər Məhkəməsində keçirilib. Araşdırma nəticəsində Sumqayıt şəhər 1 saylı Uşaq-Gənclər İdman Şahmat Məktəbinin müəllimi (UGİŞM) Ceyhun Əliyevin təqsiri sübuta yetirilib.
Zərərçəkmiş yeniyetmə Gülər (şərti) ilkin və məhkəmə istintaqı dövründə hər şeyi etiraf edib. O deyib ki, müəllimi əvvəl ona ata kimi qayğı göstərib. Hər nailiyyət qazananda başından öpüb. Sonradan bu hərəkətləri xoşuna gəlməyib. Bir müddətdən sonra müəllimi daha da irəli gedərək ona qarşı tam dərk etmədiyi əxlaqsız hərəkətlər edib.
Bütün bunlara baxmayaraq, Gülər ifadəsində müəlliminin həbs edilməsini istəmədiyini deyib. Hətta C.Əliyevin ona görə həbs edilməsini istəmədiyi üçün bir ara ilkin ifadəsini də danıb.
Cüdo müəllimi kimi 15 illik stajı olduğunu, bu müddətdə çoxsaylı gənc idmançılar yetişdirdiyini deyən Ceyhun Əliyev isə məhkəmədə özünü təqsirli bilməyib. O, ittihamda yazılan heç bir şeyin real olmadığını deyib. Amma onun bu dedikləri ibtidai istintaq müddətində müstəntiqə danışdıqları ilə ziddiyyət təşkil edib. O, əvvəlki ifadəsində ittihamda yazılanları təsdiq edib.
Məhkəmənin hökmü ilə, Ceyhun Əliyev 7 il 6 ay müddətinə azadlıqdan məhrum edilib.
