Sumqayıtlı şəhidin doğum günüdür.
Məmmədzadə İlkin Əzizağa oğlu 19 dekabr 1991-ci ildə Sumqayıt şəhərində anadan olub. 1997-2008-ci illərdə 42 saylı məktəbdə təhsil alıb. Məktəbi fərqlənmə ilə bitirib. 2008-ci ildə Azərbaycan Dövlət Aqrar Universitetinin Balıqçılıq Təsərrüfatı ixtisasına qəbul olub. Universitetdə oxuduğu müddətdə Gənclər Təşkilatına sədrlik edib. "Xəmsə" və "Breyn Rinq" yarışmalarında mübarizə aparıb.
2012-ci ildə bakalavr təhsilini qırmızı diplomla başa vurduqdan sonra, Gəncə Dövlət Aqrar Universitetində magistraturaya qəbul olub. Hərbi xidmətdən sonra elmi fəaliyyətini davam etdirib.
Azərbaycan Ordusunun baş leytenantı olan İlkin Məmmədzadə 27 sentyabr 2020-ci il Ermənistan işğalı altında olan ərazilərin azad edilməsi üçün başlanan Vətən müharibəsinə qoşulub. 20-yə yaxın yaralı hərbiçini döyüş meydanından çıxarıb.
Qəhrəman hərbçimiz 7 oktyabr saat 10:00 radələrində Tərtər-Ağdərə istiqamətində "Tülkü Dərəsi" adlanan ərazidə açıq döyüşdə hücum zamanı qəhrəmancasına şəhid olub. Ertəsi gün Sumqayıt Şəhidlər xiyabanında dəfn edilib.
Azərbaycan Respublikasının Prezidenti İlham Əliyevin müvafiq Sərəncamlarına əsasən İlkin Məmmədzadə "Suqovuşanın azad olunmasına görə", "Vətən uğrunda", "Cəsur döyüşçü" medalları ilə, III dərəcəli "Rəşadət" ordeni ilə təltif edilib.
