Novxanıda törətdiyi qəza ilə 4 nəfərin ölümünə səbəb olan Elşad Kəlbəliyevin kassasiya şikayəti üzrə məhkəmə başlayıb. Sumqayıt24 bu haqda 13 fevral tarixində Pravda.az-a istinadən xəbər verir.
Ali Məhkəmədə hakim Tahir Kazımovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Daha sonra tərəflər ifadə veriblər.
Məhkəmənin növbəti iclası fevralın 15-nə təyin edilib.
Cinayət materiallarında göstərilib ki, təqsirləndirilən şəxs 14 iyun 2021-ci il tarixində sərxoş halda “Land Rover” markalı avtomobillə 90 km/saat sürətlə Binəqədi-Novxanı yolu ilə hərəkətdə olarkən Murad Ziyadovun idarə etdiyi “Daewoo Damas” markalı avtomobillə toqquşub. Nəticədə “Daewoo Damas”ın sürücüsü M.Ziyadov, sərnişinləri - Kamran Əhmədov, Elman Şıxəliyev və Yunis Mürsəlov ölüblər. Eyni zamanda “Daewoo Damas” yararsız vəziyyətə düşüb və maşına 7 000 manat məbləğində maddi ziyan vurulub.
Bakı Ağır Cinayətlər Məhkəməsində keçirilən prosesdə E. Kəlbəliyev özünü ittiham üzrə qismən təqsirli bilib. O, ifadəsində göstərib ki, həmin gün dostları ilə Sumqayıt şəhərində oturub yemək yedikdən sonra gecə saat 12:00 radələrində oğlu zəng edərək hərarətinin qalxdığını deyib:
“Oğluma evə yollandığımı bildirdim. Sonra maşına əyləşərək Novxanı yolu istiqamətində hərəkət edərkən oğlum yenidən zəng edib, özünü pis hiss etdiyini dedi. Mən həmin vaxt maşınımla 70-80 km/saat sürətlə hərəkət edirdim. Yolun döngəli hissəsinin yaxınlığında 5-6 nəfər cavan oğlanın çimərlik paltarında yolun sağ kənarında hərəkətsiz dayandıqlarını gördüm. Həmin şəxslərin təhlükə yaratmayacaqlarına əmin olduğumdan sonra sürəti azaltmadan yoluma davam etdim və piyadalara 20-30 metr qalmış qəflətən onlar qaçaraq yolu avtomaşının hərəkəti istiqamətində sağdan sola keçməyə başladılar. Mən piyadaları vuracağımı gördüm, dərhal iti sürətlə sükanı sola buraraq, maşını əks-hərəkət yoluna çıxartdım. Sonra həmin şəxsləri vurmaqdan yayındım, lakin bu zaman avtomobilim qarşıdan gələn “Deawoo Damas” markalı maşınla toqquşdu. Nəticədə ölüm hadisəsi baş verdi. Özüm də ciddi xəsarətlər aldım. Hadisədən sonra huşsuz vəziyyətdə oldum. Bir müddət özümdə olmadım”.
O, ifadəsinin davamında söyləyib ki, ümumiyyətlə, içki içən deyil: “Həmin günü də orada içki qəbul etməmişdim”.
Elan olunub ki, hadisədə ölən şəxslərin hüquqi varisləri E. Kəlbəliyevlə barışıblar. Məhkəmənin hökmü ilə o, 9 il azadlıqdan məhrum edilib. Daha sonra məhkum bu hökmlə razılaşmayıb və apellyasiya şikayəti verib. Bakı Apellyasiya Məhkəməsinin qərarına əsasən, E. Kəlbəliyevin apellyasiya şikayəti qismən təmin olunub. Belə ki, onun cəzası 9 ildən 8 ilə endirilib.
Xatırladaq ki, E. Kəlbəliyev “Qurtuluş 93” yaşayış kompleksinin sahibi Məhərrəm Novruzovun kürəkənidir. O, “Qurtuluş 93”də satış müdiri vəzifəsində çalışıb və “Əlincə” futbol klubunun prezidenti olub.
