Bakı-Sumqayıt xətti ilə hərəkət edən avtobuslarda sərnişinlərdən əlavə ödəniş alındığı iddia edilir.
Sumqayit24.az-a müraciət edən bir qrup sakin bildirib ki, 503 nömrəli marşrut xəttində gediş haqqının 70 qəpik müəyyən edildiyi halda, sürücülər sərnişinlərdən 80 qəpik tələb edirlər.
“Hətta bir dəfə sürücü ilə mübahisə edərək, niyə əlavə 10 qəpik istədiyinin səbəbini soruşdum. O isə cavab olaraq bunun rəhbərliyin tapşırığı olduğunu dedi”, - deyə şikayətçilərdən biri bildirib.
Sakinlərin sözlərinə görə, onlar Azərbaycan Yerüstü Nəqliyyat Agentliyinə (AYNA) də dəfələrlə müraciət ediblər. Qurum isə gediş haqqının 70 qəpik olduğunu təsdiqləyib və marşrutun müvqəqqəti istismarçısına müvafiq tapşırıqların verildiyini deyib.
Lakin buna baxmayaraq, 503 nömrəli avtobusların sürücüləri hələ də sərnişinlərdən artıq pul istəməyə davam edirlər.
Redaksiyamız problemlə bağlı AYNA-ya sorğu ünvanlayıb. Qurumdan sorğumuza cavab olaraq bildirilib ki, məsələ bir daha araşdırılacaq.
Nəzrin Vahid
