Sumqayıt şəhəri, 52-ci məhəllədə yaşayan sakinlər məişət tullantılarının yığılması ilə bağlı problemlərinin olduğunu bildirirlər.
Sumqayit24.az-a daxil olan müraciətdə qeyd olunur ki, həftədə iki dəfə gəlməli olan zibil maşını bəzi hallarda ümumiyyətlə əraziyə gəlmir, bəzən isə yalnız həftədə bir dəfə xidmət göstərir. Sakinlərin sözlərinə görə, zibil maşını gəldiyi zaman da məişət tullantıları tam şəkildə yığılmır və küçələrdə tullantılar qalır.
Yaranmış vəziyyət ərazidə antisanitar şərait formalaşdırır və sakinlərin narazılığına səbəb olur. Bildirilir ki, xidmət haqqı müntəzəm ödənilsə də, tullantıların yığılması qrafikə uyğun həyata keçirilmir.
Sakinlər problemin aradan qaldırılmasını və məişət tullantılarının vaxtında, tam həcmdə yığılmasını xahiş edirlər.
Məsələ ilə bağlı Sumqayıt Təmizlik Departamentinə sorğu ünvanlanıb. Sorğuya cavab olaraq bildirilib ki, mövcud problem texniki nasazlıqlarla əlaqəlidir:
"Tərəfimizdən həmin istiqamətdə işlər davam etdirilir. Ən qısa zamanda problem həllini tapacaq".
