Sumqayıtda məktəblərin biri 6 ildir ki, fəaliyyət göstərmir.
Söhbət 18-ci mikrorayonda yerləşən 36 nömrəli məktəbdən gedir. Sumqayit24.az xəbər verir ki, sözügedən təhsil ocağı 2019-cu ildə təmir adı ilə bağlanıb, lakin işlər yalnız 4 il sonra, 2023-cü ildə başlayıb.
Pedaqoji heyət və şagirdlər isə “müvəqqəti” olaraq köhnə türk liseyinin binasına köçürülüblər. Bu səbəbdən onlar hər gün şəhərin bir tərəfindən, digər tərəfinə getməli olurlar.
Vətəndaşların çoxsaylı şikayətləri əsasında Abşeron-Xızı Regional Təhsil İdarəsinə sorğu ünvanladıq, təmir işlərinin nə zaman yekunlaşacağı, məktəbin müəllim və şagirdlərin istifadəsinə veriləcəyi tarixlə maraqlandıq.
Qurumdan isə şablon “araşdırıb, məlumat verəcəyik” cavabını aldıq. Həmin vaxtdan 10 gün keçsə də, “araşdırma” bitməyib, ya da ümumiyyətlə aparılmayıb.
