Sumqayıtda avtobusda insident yaşanıb.
Sumqayit24.az-a bu barədə şahidlər məlumat veriblər. Onların sözlərinə görə, hadisə 7 nömrəli marşrut xətti üzrə hərəkət edən 50 AE 634 dövlət qeydiyyat nişanlı avtobusda qeydə alınıb.
Şahidlər iddia edirlər ki, insident sürücünün qəfil tormozlamasından başlayıb:
“Avtobus sürücüləri enib-düşərkən sərnişinləri tələsdirir, normal hərəkət etməyə imkan vermirlər. Avtobusda xəstə, yaşlı kişi var idi. Sürücü əyləcə necə basdısa, az qala hamı yıxılsın. Qoca kişi də müvazinətini saxlaya bilmədi və əlindəki torbadakı ərzaq məhsulları yerə töküldü. Ağsaqqal yerdəki ərzaqları yığa-yığa sürücüyə iradını bildirdi və avtobusdan endi”.
Sakinlərin sözlərinə görə, avtobusda “konduktor” işləyən gənc oğlan kişinin ardınca düşərək onu yerə yıxıb və təpikləyib. Digər sərnişinlər isə müdaxilə edərək, "konduktor"la mübahisə edib hərəkətinin yanlış olduğunu bildiriblər.
