Sumqayıtda avtobusun sürücüsü cərimələnib.
Xeberle.com-un məlumatına görə, 50-AF-342 nömrəli "7" saylı avtobusun sürücüsü nəqliyyat vasitəsinin arxa qapılarını bilərəkdən açmayaraq, sərnişinlər arasında kütləvi narazılığa səbəb olur. Bəzən bunun münaqişə yaratdığı da bildirilir. Sərnişinlərin sözlərinə görə, bu hal xüsusən də Sumqayıt avtovağzalının yanında müşahidə edilir.
Belə ki, səhər saatlarında avtobus dolu olsa da, sürücü arxa və orta qapıları açmır. Nəticədə bu da sərnişinlərin kütləvi narazılığına gətirib çıxarır.
Məlumata görə, 50-AF-342 saylı avtobus yüksək sürət səbəbindən fevral ayında digər bir sərnişin avtobusu ilə də toqquşub.
Məsələylə bağlı AYNA-dan açıqlama verilib. Qeyd olunub ki, daşıyıcıya sərnişindaşıma qaydalarına ciddi riayət etməyi və araşdırma apararaq sürücü barədə müvafiq tədbir görməklə bağlı tapşırıq verilib.
Daha sonra "7” və "7a” nömrəli avtobus xətlərinə cavabdeh şəxslə əlaqə saxlanılıb. Kalon rəisi Məhəbbət bəy sürücü barədə müvafiq tədbir görüldüyünü və 100 AZN cərimə yazıldığını bildirib.
