Sumqayıtda bəzi marşrut sürücülərinin məsuliyyətsiz davranışı artıq adi hala çevrilib. Xüsusilə 7 nömrəli xətt üzrə fəaliyyət göstərən sürücülərin bəziləri demək olar ki, yol hərəkəti qaydalarına məhəl qoymurlar.
Sumqayit24.az-a təqdim olunan görüntülərdə Babək küçəsində onsuz da ağır olan tıxac şəraitində avtobuslardan birinin "protiv" hərəkət etdiyi əks olunub. Bu cür davranış həm digər sürücülər üçün çətinlik yaradır, həm də qəza riskini ciddi şəkildə artırır.
Diqqətçəkən məqam isə bu halın ilk dəfə baş verməməsidir. Bir neçə gün əvvəl də eyni marşrut üzrə oxşar qayda pozuntusu qeydə alınıb. Həmin vaxt sürücü Üzeyir Hacıbəyov küçəsində qarşı zolağa çıxaraq hərəkətini davam etdirib.
Görünən odur ki, bəzi sürücülər üçün nə qaydalar, nə də məsuliyyət anlayışı mövcuddur. İctimai nəqliyyatın bu şəkildə idarə olunması isə şəhərdə təhlükəli vəziyyət yaradır.
