Bakı-Sumqayıt qatarlarının sərnişinləri ödədikləri vəsaitin bir hissəsini geri almaq imkanı qazanacaqlar.
Sumqayıt24.az xəbər verir ki, Azərbaycan Dəmir Yolları (ADY) bu həftədən etibarən loyallıq proqramının tətbiqinə başlayıb. Bu proqram şəhərətrafı qatarlarla səfər edən sərnişinlərə “ADY Mobile” tətbiqi vasitəsilə daha sərfəli və rahat səyahət imkanları yaradır, gedişlər üzrə 3% keşbek, qeydiyyat, dostun dəvət edilməsi, sorğularda iştirak və qiymətləndirmələr zamanı bonus qazandırır.
ADY, həmçinin 1 noyabr tarixindən ölkədaxili marşrutlar üzrə dinamik qiymət siyasətinə keçir. Yeni qiymət siyasətinə əsasən, bilet qiymətləri tələbdən asılı olaraq dəyişə biləcək. Bilet satış sisteminə inteqrasiya edilmiş qabaqcıl texnologiyalar sayəsində sərnişinlərə real vaxtda qiymətləri izləmək və ən uyğun səyahət vaxtını seçmək imkanı yaradılır. Artıq səfərə 25-30 gün qalmış və əks istiqamətdə oturacağa bilet almış sərnişinlər 15% endirimdən yararlana biləcəklər.
Qeyd edək ki, sentyabrın 25-dən etibarən Bakı Dairəvi Dəmir Yolu xəttində qiymət cədvəli yenilənib.
