Sumqayıtda dərmandan zəhərlənərək öldüyü iddia edilən şəxslə bağlı detallar məlum olub.
Bu barədə Sumqayit24.az-a 59 yaşlı Ramiz Piriyevin dərman həbindən zəhərləndiyi iddia edilən Sumqayıt Psixiatriya Xəstəxanasının baş həkimi Elizbar Bəbirov açıqlama verib.
O, bildirib ki, xəstə yanvar ayının 13-dən Sumqayıt Şəhər Təcili və Təxirəsalınmaz Tibbi Yardım Xəstəxanasının terapiya şöbəsinə köçürülüb:
“Ramiz Piriyev uzun müddətdir ki, ruhi xəstədir. Mütəmadi olaraq gəlib, bizim xəstəxanada müayinə və müalicə olunub gedirdi. Sonuncu dəfə sentyabr ayının 28-də bizim xəstəxanaya gəldi, yenidən müalicələri başlandı.
Son günlər gördük ki, səhhətində problem var. Öskürürdü, temperaturu da var idi. Biz müayinələr etdik, onda törədici dəqiqləşdirilməyən pnevmoniya, eksudativ plevrit aşkarlandı. Terapiya şöbəsinə köçürülüb, müayinə və müalicə olunması məsləhət görüldü. Biz də təcili yardım briqadası ilə onu Sumqayıt Şəhər Təcili və Təxirəsalınmaz Tibbi Yardım Xəstəxanasının terapiya şöbəsinə köçürdük.
Yanvar ayının 25-də sözügedən tibb müəssisəsindən bizə məlumat verdilər ki, Ramiz Piriyev reanimasiyada dünyasını dəyişib. Yaxınlarını tapa bilmirdilər. Bizdən məlumat almaq istəyirdilər, əlaqələndirdik”.
E.Bəbirov qeyd edib ki, xəstə dərman qəbul etməyib:
“Onun ağciyərlərinə maye yığılmışdı. Dərman içməyib. Yalan-yanlış yazırlar. Bizim tibb ocağının adı hallanır. Xəstəxanamız ilə əlaqəsi yoxdur. O, çox siqaret çəkirdi. Özünə baxmayan, problemli şəxs idi. Yoldaşı ilə ayrılmışdı və evdən də çıxarılmışdı. Oğlu dünyasını dəyişib, qızı da ailə həyatı qurub. Arvadı da ondan imtina edib”.
Nəzrin Vahid
