Bütün dünyada ictimai nəqliyyatda gediş haqları əsasən müxtəlif bank kartları üzərindən ödənilir. Azərbaycanda isə dəmir yollarında gediş haqlarını bank kartı vasitəsilə ödəmək mümkündürsə, avtobus və metro sərnişinləri bundan məhrumdurlar.
Mövzu ilə bağlı fikirlərini Bizim.Media ilə bölüşən iqtisadçı ekspert Aqil Məmmədov bildirib ki, bu günlərdə Bakı Formula 1 yarışlarına ev sahibliyi edib, noyabrda COP29 konfransı keçiriləcək. Yəni, minlərlə insan Bakıya səfər edir və metrodan, avtobusdan istifadə etməyə çalışır. Deməli, bizim əsas vəzifələrimizdən biridə ictimai nəqliyyatı əlçatan etməkdir:
“Misal üçün,Tükiyədə istənilən bank kartıyla ictimai nəqliyyatda ödəniş etmək olur, Rusiyada “Master” və “VİSA” kartları işləməsə də “Mir” kartınız varsa, yolda qalmayacaqsınız. Rahat ödəniş edib istədiyiniz ünvana gedəcəksiniz. Azərbaycanda isə yalnız Bakı ətrafı qatarlarda bank kartıyla ödəmə tətbiq edilib. Ancaq bu da tam deyil. “VİSA” kartı ilə ödəmə mümkündür, ancaq “Master” sahibləri bu imkandan məhrumdur”.
Müsahibim onu da qeyd edib ki, Bakıda əksəriyyətin “Master” və VİSA” kartları var:
“Lakin bu kartlar ictimai nəqliyyatda keçərli deyil. Bu insanlar üçün xidmətlərdən istifadəni çətinləşdirir və öz növbəsində narazılıqlara gətirib çıxarır. Formula 1 yarışlarına bunu çatdıra bilmədik. Ancaq COP29 Konfransına qədər problemi həll edə bilərik. Bunun üçün sadəcə kiçik bir addım və istək lazımdır”.
