Sumqayıtda həbsxanaya narkotik keçirmək istəyən məhkuma yeni hökm oxunub.
Lent.az-ın məlumatına görə, şəhərdəki cəzaçəkmə müəssisələrindən birində cəza çəkən K. Nəcəfov uzunmüddətli görüşdən qayıtdıqdan sonra şalvarının sağ cibindən 1,53 qram qurudulmuş marixuana aşkarlanıb.
Bu əmələ görə onun barəsində Cinayət Məcəlləsinin 317-2.1-ci (cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi) maddəsi ilə yeni ittiham irəli sürülüb.
Sumqayıt Şəhər Məhkəməsinin qərarı ilə onun həbs müddəti 5 ay artırılıb.
Məlumata görə, K. Nəcəfov 2019-cu ildə Şəki Ağır Cinayətlər Məhkəməsinin hökmü ilə 6 il müddətinə azadlıqdan məhrum edilib. Bildirilir ki, o, cəmi 1 ay 6 gün sonra azadlığa çıxmalı imiş.
