Azərbaycanda bir neçə aydır ki, Aİ-95 markalı benzinin istehsalına başlanıb, tənzimlənən qiymətlərlə 1,60 AZN-ə satılır. Amma hələ Aİ-95 markalı benzin tənzimlənən qiymətlərlə satılan məhsullar siyahısına daxil edilməyib. Nazirlər Kabineti tərəfindən Aİ-95 də bu siyahıya salınacaq. Bu barədə Energetika Nazirliyinin İqtisadiyyat şöbəsinin müdiri Rauf Qurbanov bildirib.
Qeyd edək ki, hazırda Aİ-92 markalı benzinin qiyməti Tarif Şurası tərəfindən tənzimlənir. Bu benzinin qiyməti 1.10 AZN-dir.
Modern.az-ın məlumatına görə, mövzu ilə bağlı rəy verən iqtisadçı ekspert Xalid Kərimli hökumətin benzin növləri üzərində qərar qəbul edilmə prosesini Tarif Şurasının çərçivəsinə salması qərarların qəbulu zamanı SOCAR şirkətinin nəzərə ala bilməyəcəyi amillərin də nəzərə alınmasına gətirib çıxaracağını, bunun da məzmun maraqlarının uzlaşdırılması baxımından faydalı olduğunu bildirib.
"Bütün bunların fonunda daha mühüm xəbər ondan ibarətdir ki, Aİ-95 markalı benzin ölkə daxilində istehsal olunur. Bu o deməkdir ki, artıq daha ucuz maya dəyərində istehsal edilməsi imkanları mövcuddur. Əvvəllər Aİ-95 markalı benzini xaricdən idxal edirdik. Bu zaman isə əlavə logistik xərclər, istehsalçının istədiyi mənfəət marjasını qəbul etmək məcburiyyətində idik", - deyə o, televiziyaya açıqlamasında deyib.
Ekspert qeyd edib ki, hazırda Aİ-95 markalı benzinin ölkə daxilində istehsal edilməsi də həm qiymətlərin kəskin tərəddüdünün qarşısını alır, həm də benzinin həddən artıq qazancla satılmasının qarşısını alır.
